सोइ कछु कीजै दीन-दयाल

सोइ कछु कीजै दिन दयाल।

जातें जन छन चरण न छाड़ें, करुणा-सागर भक्त-रसाल॥

सोइ कछु कीजै दीन दयाल।

इंद्री अजित बुद्धि विषयारत, मन की दिन-दिन उल्टी चाल।

काम, क्रोध, मद-लोभ-महाभय, अह-निसि नाथ रहत बेहाल॥

सोइ कछु कीजै दीन-दयाल।

जाग-जुगति, जप-तप, तीरथ-ब्रत, इन मैं एकौ अंक न भाल।

कहा करौ, किहिं भांति रिझावौं, हौं तुम को सुंदर नंदलाल॥

सोइ कछु कीजै दीन-दयाल।

सुनि सम्राट, सर्वज्ञ कृपानिधि, असरन-सरन, हरन, जग-जाल।

कृपानिधान, सूर कौ यह गति, कासौं कहै कृपन इहिं काल॥

सोइ कछु कीजै दीन-दयाल। 

___________________________

जनम तौ ऐसेहिं बीत गयौ...

जनम तौ ऐसेहिं बीत गयौ।

जैसे रंक पदारथ पाये, लोभ बिसाहि लयौ॥

जनम तौ ऐसेहिं बीत गयौ।

बहुतक जन्म पुरीष परायन, सूकर-स्वान भयौ।

अब मेरी – मेरी कर बौरे, बहुरौ बीज बयौ॥

जनम तौ ऐसेहिं बीत गयौ।

नर कौ नाम पारगामी हौ, सो तोहि स्याम दयौ।

तै जड़ नारिकेल कपि-कर ज्यौं, पायौ नाहिं पयौ॥

जनम तौ ऐसेहिं बीत गयौ।

रजनी गत बासर मृगतृष्णा, रस हरि कौ न चयौ।

सूर नन्द-नन्दन जेहिं बिसरयौ, आहूहिं आप हरौ॥

जनम तौ ऐसेहिं बीत गयौ। 

________________________

भजन बिनु जीवत जैसे प्रेत

भजन बिनु जीवत जैसे प्रेत।

मलिन मंद मति डोलत घर-घर, उदर भरन के हेत॥

भजन बिनु जीवत जैसे प्रेत।

मुख कटु-बचन नित्त पर निंदा, संगति सुजस न लेत।

कबहुँ पाप करय पावत धन, गाड़ि धूरि तिही देत॥

भजन बिनु जीवत जैसे प्रेत।

गुरु ब्रहमन अरु संत-सुजन के, जात न कबहुँ निकेत।

सेवा नहिं भगवंत - चरण की, भवन नील कौं खेत॥

भजन बिनु जीवत जैसे प्रेत।

कथा नहीं गुण-गीत सुजस हरि, सब काहू दुख देत।

ताकी कथा कहाँ सुनि सूरज, बूड़त कुटुंब समेत॥

भजन बिनु जीवत जैसे प्रेत।

________________________________